 |
|
 |
| Don Juan Manuel |
|
Libro del cauallero et
del escudero Miguel Vicente Pedraz CAPITULO QUINQUAGESSIMO –Sennor –dixo el cauallero mançebo–, non se commo pudiesse gradesçer a Dios et a vos quanto bien tengo que me ha venido en estas cosas que me vos mostrastes; et quiera Dios por la su merçed que de alguna dellas me pueda yo aprouechar en guisa que sea su seruiçio, et me venga ende pro al alma et al cuerpo. Et çierto seed que yo tengo que todas estas cosas que me vos avedes mostrado son todas muy buenas et muy aprouechosas. Et a lo que me rogastes que vos non fiziesse mas preguntas, sabet que commo quier que muchas cosas que yo tenia que me cunplian que vos queria preguntar, que lo dexare por vos non fazer enojo. Et pues veo que vos tantas bue[n]as cosas me auedes mostrado, que si yo las pudiesse aprender, que me cu[n]pli[ri]an asaz. Et a la pregunta que me feziestes, vos digo que commo quier que yo so de poco entendimiento, que todas las cosas que oue de fazer sienpre las fiz en esta manera: quando contienda oue con alguno, sienpre espere que el tuerto que se leuantasse del; et las cosas que oue de començar, en que avia alguna grand aventura, sienpre pense si me podria parar al mayor contrario si acaeciesse, et si entendi que me podria parar a ello, [començelo], et si non, dexe de lo començar. Et en las otras obras, commo de rentas o de labores, acomendelas sienpre en tal recabdo que en faziendo se las vnas se fazian las otras, et non se enbargauan las vnas por las otras; et ante que lo començasse, sienpre cate onde lo podria acabar. Et en las cosas que oue a fazer de algunas sçiençias o de algunos libros o de algunas estorias, esto finca de lo del tienpo que avia a dormir.
|
||
Miguel Vicente Pedraz |
||
| © José Luis Gómez-Martínez |
||
 |
 |
 |
 |
 |
 |
