 |
|
 |
| Don Juan Manuel |
|
Libro del cauallero et
del escudero Miguel Vicente Pedraz CAPITULO XLVIIIIº –Fijo, commo quier que yo tengo [que] a tantas preguntas et tan estrannas que me vos feziestes, que yo non vos podia responder nin vos respondi tan conplida mente commo era mester, pero gradesco mucho a Dios que en qual quier manera que fue, que vos he respondido a todo, et ruego vos que si alguna cosa ay que tengades por aprouechosa, que lo gradescades a Dios et que creades que todos los bienes vienen del et non de otra cosa ninguna. Et muchas cosas que so yo çierto que fallaredes y que non son muy aprouechosas nin de muy buen recabdo, que me non pongades culpa nin vos marabilledes ende. Otrosi vos ruego que pues que a estas preguntas que me vos feziestes uos he respondido en la manera que yo pude, que me non querades fazer mas preguntas daqui adelante. Ca bien creed que tanto he dexado de mi oracion et de otras cosas que me avia de fazer para emendar alguna cosa a nuestro sennor Dios de muchos yerros et pecados quel yo fiz, para cuydar en las respuestas que vos avia a dar, que si agora en otras me metiessedes, que me seria grant danno, et non lo faria en ninguna manera del mundo. Et ruego vos que pues vos yo respondi a todas las preguntas que me feziestes, que me respondades vos a mi a vna. Et la pregunta es esta: et vos tan mançebo sodes et, segund lo que yo se de la vuestra fazienda, tantos trabajos vos acaeçieron desde vuestra moçedat fasta agora, que nunca oviestes tienpo para poder cuydar en tantas cosas commo yo veo et se que vos avedes fecho, por ende vos ruego que me digades en pocas palabras en qual manera lo pudiestes fazer.
|
||
Miguel Vicente Pedraz |
||
| © José Luis Gómez-Martínez |
||
 |
 |
 |
 |
 |
 |
